Sasindu Sahan Tharaka May 1, 2024
එංගලන්තයට හා ස්වීඩනයට අයත් දැවැන්ත බෙහෙත් සමාගමක් වන ‘ඇස්ට්‍රාසෙනෙකා’ සමාගම තමන් නිපදවූ කොරෝනා එන්නත හරහා දුර්ලභ අතුරු ආබාධ තත්ත්වයක් ඇති විය හැකි බවට පිළිගෙන ඇත.
ඉකුත් පෙබරවාරි මාසයේදී එංගලන්තයේ මහාධිකරණය වෙත ඉදිරිපත් කරන ලද නීති ලියවිල්ලක් මගින් ඇස්ට්‍රා සෙනෙකා සමාගම මේ බව පිළිගෙන තිබූ බවත්, ඇස්ට්‍රාසෙනෙකා එන්නත ලබා ගැනීමේ අතුරු ආබාධයක් ලෙස රුධිර කැටි ඇති වීමේ හා රුධිර පට්ටිකා අඩු වීමේ රෝගය හෙවත් ත්‍රොම්බෝසිස් ත්‍රොම්බෝසයි ටෝපේනියා සින්ඩ්‍රෝම් (ටීටීඑස්) රෝගය ඇති විය හැකි බවත් එම සමාගම පිළිගෙන ඇති බව විදෙස් මාධ්‍යය වාර්තා කරයි.
ඇස්ට්‍රා සෙනෙකා සමාගම නිපදවූ කොරෝනා එන්නත විද ගැනීමෙන් බොහෝ දෙනකු මරණයට පත් වූ බවත් තවත් පිරිසකට දරුණු ආබාධ හටගත් බවත් පවසමින් එංගලන්ත මහාධිකරණය හමුවේ අදාළ සමාගමට එරෙහිව නඩු 51ක් ගොනු කර ඇති බවත් බව එංගලන්තයේ පළ වන ‘ද ටෙලිග්‍රාෆ්’ පුවත්පත පෙන්වා දෙයි. එහිදී පෙත්සම්කරුවන්, වින්දිතයන් හා එන්නත විදීමෙන් අනතුරුව මිය ගිය අය වෙනුවෙන් ඇස්ට්‍රා සෙනෙකා සමාගමෙන් පවුම් මිලියන 100කට අධික වන්දි මුදලක්ද ඉල්ලා ඇති බවයි වාර්තා වන්නේ.
ජේමි ස්කොට් නමැති දෙදරු පියෙකු විසින් අදාළ සමාගමට එරෙහිව පළමූ නඩුව ගොනු කර තිබූ අතර එහි දී ඔහු අවධාරණය කළේ, ඔහු 2021 අප්‍රේල් මාසයේදී එන්නත ලබා ගැනීමෙන් පසු ඔහුට රැකියාවේ කටයුතු කරගැනීමට නොහැකි වූ බවයි. තවද රුධිර කැටියක් සහ මොළයේ ලේ ගැලීමක් වර්ධනය වීමෙන් පසු මොළයේ ස්ථීර තුවාලයක් හට ගත් බවද ඔහු පෙන්වා දී ඇත.
කෙසේවෙතත් ඉකුත් 2023 වසරේ මැයි මාසයේදී ඇස්ට්‍රාසෙනෙකා සමාගමේ නීතිවේදීන් එම සමාගමට එරෙහිව එල්ල වී තිබූ චෝදනා වලට පිළිතුරු සපයමින් පවසා තිබුණේ ඇසෙනෙකා එන්නත මගින් ත්‍රොම්බෝසිස් ත්‍රොබෝසයිටෝපේනියා සින්ඩ්‍රෝම් රෝගය ඇති වන බව පිළිගත් නොහැකි බවයි.
ඔක්ස්ෆර්ඩ් විශ්ව විද්‍යාලය හා ඒකාබද්ධව ඇස්ට්‍රා සෙනෙකා සමාගම විසින් නිපද වූ කොරෝනා එන්නත ‘වැස්සෙවේරියා ‘ හා කොවිෂිල්ඩ්’ යන වෙළෙඳ නාමයන් යටතේ නිපදවා නිකුත් කරනු ලැබු අතර මෙම එන්නත කොරෝනා ආසාදනයෙන් වැළකීම සඳහා නිපදවා තිබූ සෙසු එන්නත් 39 ක පමණ සංඛ්‍යාවට වැඩි ප්‍රමාණයකින් ලෝකයේම වෙසෙන ජනතාව වෙත ලබා දි ඇති බවද වාර්තා වෙ.
විදෙස් මාධ්‍යය වාර්තා වලට අනුව එම එන්නත් මාත්‍රා බිලියන 1.3කට අධික සංඛ්‍යාවක් කොරෝනා සමයේ ජනතාවට ලබා දී ඇත.