Admin User September 8, 2024කාන්තාවකගේ වකුගඩු දෙකම ඉවත් කර ඇයට නැවත වකුගඩු නැවත බද්ධ කිරීමට අදාළ විශේෂඥ වෛද්‍යවරයා එම සැත්කම වර්ජනය කළ සිද්ධියක් පිළිබඳ පුවතක් ජයවර්ධනපුර රෝහලෙන් වාර්තා වනවා.
ජයවර්ධනපුර රෝහලේ වකුගඩු අංශයේ ප්‍රවේණිගත බහු කෝෂ්ඨ වකුගඩු රෝගයක් ඇති බවට නිර්දේශ වී ප්‍රතිකාර ලබමින් සිටි බී. පී. එන්. කුමුදුනී දිගුකාලීන වකුගඩු රෝගී තත්වයකින් පෙළුණු තැනැත්තියක් බව වාර්තා වේ.
ඩුබායි හි වාසය කළ බී. පී. එන්. කුමුදුනී තම වකුගඩු රෝගයට ප්‍රතිකාර ලබා ගැනීම සදහා මෙරටට පැමිණ තිබුණු අතර වකුගඩු බද්ධ කිරීම සඳහා ජයවර්ධනපුර රෝහල වෙත ගොස් තිබුණා.
විශේෂඥ වෛද්‍යවරුන්ගේ වෛද්‍ය වාර්තා අනූව ඇයගේ වකුගඩු වල අකර්මන්‍යතාවක් පැවතියත් දිනකට මුත්‍රා ලීටර 1.5 පෙරෙමින් ජීවිත තර්ජන තත්ත්වයක් ඇයට නොමැති බව පෙන්වා දී තිබුණා.
කෙසේ වෙතත් ඇයගේ සොහොයුරියක් ඇය වෙත වකුගඩුවක් ලබා දීමට ද කැමැත්ත දක්වා තිබුණා.
වකුගඩු පිළිකාව වැනි දරුණු තත්වයක් වෙත ඇය සේන්දු වී නොතිබීම නිසා වකුගඩු බද්ධ කිරීමක් ක්ෂණිකව අවශ්‍ය නොවන බවත් විශේෂඥ වෛද්‍යවරුන් කරුණු දක්වා තිබුණා.
නමුත් ජයවර්ධනපුර රෝහලේ වකුගඩු අංශයේ ලියාපදිංචි අංක 2216952 යටතේ ප්‍රතිකාර ගනිමින් සිටි කුමුදුනී ගේ වකුගඩු දෙකම ඉවත් කර දැමීමට එම රෝහලේ වකුගඩු අංශයේ විශේෂඥ වෛද්‍යවරයා නිර්දේශ කර තිබෙනවා.
ඒ අනූව පසුගිය මාර්තු 04 වනදා ඇයගේ වකුගඩු දෙකම ඉවත් කර තිබුණේ නැවත සති 6ක දී වකුගඩු බද්ධයක් සිදු කරන බවට නිගමනයකින් පසුවයි.
ජයවර්ධනපුර රෝහලේ ඇයගේ වකුගඩු බද්ධය සඳහා අවශ්‍ය සියලු පහසුකම් පවතින අතර ඇයට වකුගඩුවක් ලබා දීමට කැමැත්ත ලබා දුන් සොහොයුරියගේ පර්‍යේෂණ කටයුතු ද සූදානම්ව තිබූ පසුබිමක පසුගිය මාර්තු 11 වන දින ජයවර්ධනපුර රෝහලේ වකුගඩු බද්ධ කිරීම ඒක පාර්ශවීය වර්ජනයක් ආරම්භ කරනු ලැබුවා.
ඒ සඳහා අදාළ විශේෂඥ වෛද්‍යවරයා ලබා දී ඇති හේතුව නම් තමා සමග රාජකාරියේ යෙදෙන අනෙක් විශේෂඥ වෛද්‍යවරිය සමග ඔහුට වැඩ කිරීමට නොහැකි බවයි.
වකුගඩු දෙකම පූර්ණ අක්‍රීය මට්ටමක පවතින රෝගීන්ට ද නවීන රුධිර කාන්දු පෙරණ සත්කාරය මගින් ජීවිතය ගැට ගසා ගත හැකි බවට වෛද්‍ය විද්‍යාත්මකව තහවුරු කර තිබෙනවා.
අනෙක් අතට වකුගඩු බද්ධයකදී සිදු කරනුයේ අක්‍රීය වූ වකුගඩු දෙක පවතිද්දී ක්‍රියාකාරී වකුගඩුවක් එක් වකුගඩුවක වාහිනී පද්ධතියකට බද්ධ කිරීමක් පමණක් බව විශේෂඥ වෛද්‍යවරුන් ද පෙන්වා දෙන කරුණක්.
එවන් වටපිටාවක කුමුදුනී ගේ වකුගඩු දෙකම ගලවා ඉවත් කිරීමෙන් මෙම විශේෂඥ වෛද්‍යවරයා බලාපොරොත්තු වූයේ කුමක්ද යන්න තවමත් අභිරහසකි.
කෙසේ වෙතත් ජයවර්ධනපුර රෝහලේ මෙම මෞත්‍ර ලිංගික හා අවයව බද්ධ කිරීමේ විශේෂඥ වෛද්‍යවරයා මාස 6ක් මුළුල්ලේ මෙවන් වකුගඩු බද්ධයන් මගහරිමින් සිටින බවට රෝගීන් චෝදනා කරනවා.
කුමුදුණීගේ වකුගඩු දෙක වෙන් කිරීමකින් තොරව එලෙසම තිබෙන්නට හැරියා නම් ඇයට යම්තාක් දුරකට රිසි සේ ජීවත් වීමට අවස්තාව හිමි වනවා. නමුත් මෙම අශිෂ්ඨ වෛද්‍යවරයාගේ ක්‍රියාකලාපය හේතුවෙන් කුමුදුණී මරණය කරා ලඟා වෙමින් පවතිනවා.
ඇයගේ ශල්‍යකර්මය වෙනුවෙන් වෙන් කර ඇති මුදල් භාවිතා කරමින් ඇය මේ වන විට මසකට රුපියල් ලක්ෂය බැගින් වන රුධිර කාන්දු පෙරණ ක්‍රියාවලියකට මුහුණ දෙමින් යන්තම් ජීවිතය ගැටගසා ගෙන සිටිනවා.
තමාට සිදු වූ අසාධාරණය දැනුවත් කිරීම වෙනුවෙන් ඇය රෝහල් පරිපාලනයට, සෞඛ්‍ය ඇමතිවරයාට, සෞඛ්‍ය ලේකම්වරයාට ලිඛිතව දැනුවත් කර තිබුණා.
ඒ අනූව ක්‍රියාත්මක වන රෝහල් පරිපාලනය වහාම ක්‍රියාත්මක වන පරිදි මෙම විශේෂඥ වෛද්‍යවරයාගේ වැඩ තහනම් කරනු ලැබීය.
මේ අතර අදාළ විශේෂඥ වෛද්‍යවරයා වසර 10ක පමණ කාලයක් තිස්සේ රෝහල් පරිපාලනය සහ කාර්ය මණ්ඩලය ද මුදල් බලයෙන් පාලනය කර ඇති බවට විශ්වාසවන්ත ආරංචි මාර්ග පවසයි.
ඊට අමතරව ජයවර්ධනපුර රෝහලේ වකුගඩු බද්ධ කිරීමේ සැත්කම් ප්‍රමාද කරමින් එම රෝගීන්ව තලවතුගොඩ පෞද්ගලික සායනයක් වෙත ගෙන්වාගෙන මුදලට එම සැත්කම් කරන බවට තොරතුරු අනාවරණය වී තිබුණා.
ඒ සඳහා එක් රෝගියෙකුගෙන් ඔහු අය කර ඇති මුදල ලක්ෂ 35කට ඉහළයි. එම සැත්කම ජයවර්ධනපුර රෝහලේ දී ලක්ෂ 8ක් වැනි මුදලකට කරගත හැකි බවත් තොරතුරු අනාවරණය වී තිබෙනවා.
ජයවර්ධනපුර රෝහලේ සභාපති වෛද්‍ය සාරංග අලහප්පෙරුමගෙන් කල විමසීමකදී ඔහු සඳහන් කරන ලද්දේ මේ පිළිබඳව කරුණු අනාවරණය වී ඇති බවත් ඒ ගැන අපක්ෂපාතී විශේෂ පරීක්ෂණයක් මේ වන විටත් පැවැත්වෙන බවයි.
