Sasindu Sahan Tharaka January 5, 2024විපක්ෂ නායක සජිත් ප්‍රේමදාස මහතා සහ නවසීලන්ත මහකොමසාරිස් Micheal Appleton මහතා අතර හමුවක් (4) විපක්ෂ නායක කාර්‍යාලයේදී සිදු විය.
නවසීලන්ත මහකොමසාරිස්වරයා මෙරට තුළ සිය සේවා කාලය අවසන් කර සිය රට බලා යාමට පෙර විපක්ෂ නායක සජිත් ප්‍රේමදාස මහතා හමු වූ අතර එහි දී දෙපාර්ශ්වය අතර වත්මන් ශ්‍රී ලංකාවේ සමාජ, ආර්ථික, දේශපාලන තත්ත්වය සම්බන්ධයෙන් දීර්ඝ වශයෙන් සාකච්ඡාවට ලක් විය.
එහි දී විපක්ෂ නායක සජිත් ප්‍රේමදාස මහතා විසින් වත්මන් රජය ජනතාව පීඩාවට පත් කරමින් පනවා ඇති අධික බදු සම්බන්ධයෙන් පැහැදිලි කිරීමක් සිදු කල අතර බදු පැනවීමෙන් තොරව රාජ්‍ය ආදායම වැඩි කළ හැකි ආකාරය සම්බන්ධයෙන් ද විපක්ෂ නායක සජිත් ප්‍රේමදාස මහතා විසින් නවසීලන්ත මහකොමසාරිස්වරයාව දැනුවත් කළේය.
ඊට අමතරව රජය හිතාමතාම ජනතාවගේ ප්‍රජාතන්ත්‍රීය අයිතිය උල්ලංඝනය කරමින් මැතිවරණ දිගින් දිගටම කල් දමා ඇති ආකාරය ද පැහැදිලි කිරීමක් සිදු කරන ලදී.
එසේම නවසීලන්ත මහකොමසාරිස්වරයා විසින් පසුගිය කාලයේ ශ්‍රී ලංකාව තුළ සිදු කළ සේවාවට ස්තූතිවන්ත වීමට ද විපක්ෂ නායක සජිත් ප්‍රේමදාස මහතා මෙහි දී කටයුතු කළේය.
මේ අවස්ථාවට නවසීලන්ත නියෝජ්‍ය මහකොමසාරිස්වරයා වන Andrew Traveller මහතා ද සමගි ජන බලවේගය නියෝජනය කරමින් නිරෝෂන් පෙරේරා සහ කාවින්ද ජයවර්ධන යන පාර්ලිමේන්තු මන්ත්‍රීවරුන් එක්විය.
