තරුණ පරපුරේ සදාචාරය ගොඩනැගීම සඳහා දේශපාලන වේදිකාවේ ප්‍රකාශ සිදුකරන අතරේ ජාතික ජන බලවේගය තරුණ පරපුර නොමග යවමින් අනතුරේ හෙළමින් සිටින බව බොදුබල සේනා සංවිධානයේ මහලේකම් ගලගොඩඅත්තේ ඥාණසාර භික්ෂුව පවසයි.

මාධ්‍ය අමතමින් ඥාණසාර භික්ෂුව පවසන්නේ, ජාතික ජන බලවේගයේ ඇතැම් සාමාජිකයන් වෛරී ප්‍රකාශ සිදුකිරීමටත් සිංහල බෞද්ධ ජනතාවට අපහාස කරමින් තරුණ පරපුර අනතුරේ හෙළීමටත් පටන් ගෙන ඇති බවයි.

“මේ දේශපාලනඥයෝම අලුත් දේශපාලන සංකේතවලට මාරු වෙනවා. ඒවයේ අලුත් දෙයක් නැහැ. සියලුම දේශපාලනඥයන් තමන්ගේ පෙර ලකුණ යටතේ පරාජය වුණොත් අලුත් දේශපාලන සංකේතයක් හඳුන්වාදෙනවා,” යැයි භික්ෂුව පවසයි.

“මේ දවස්වල ජාතික ජන බලවේගය තරුණ පරම්පරාවේ වැඩි අවධානයක් දිනා ගන්නවා. බොදුබල සේනා සංවිධානය හැටියට අපි ඔවුන් කරන ප්‍රකාශ සහ ඒවා භාවිතා කරන ආකාරය ගැන අවදියෙන් ඉන්නවා. පසුගිය කාලයේ ජාතික ජන බලවේගයේ සාමාජිකයින් මහා සංඝරත්නයට අපහාස කළා.” භික්ෂුව පෙන්වාදෙයි.

වෛරී ප්‍රකාශවලට තිත තබා විවෘත විවාදයකට පැමිණෙන ලෙස ද පූජ්‍ය ගලගොඩඅත්තේ ඥානසාර භික්ෂුව ජාතික ජන බලවේගයෙන් ඉල්ලා සිටියි.

තරුණ තරුණියන්ගේ බලාපොරොත්තු සහ අපේක්ෂා ඉටු නොකළහොත් ජනතාව හිටපු ජනාධිපති ගෝඨාභය රාජපක්ෂ බලයෙන් පහකිරීමට ගත් තීරණයම ගන්නා බව ජාතික ජන බලවේගය මතක තබාගත යුතු බව ද භික්ෂුව වැඩිදුරටත් සඳහන් කර ඇත.

Post Views: 186