යාපනය – වඩුක්කෝට්ටේ පොලිසිය විසින් වධ හිංසා පමුණුවා ඝාතනය කළ බව කියන චිත්තකේනි ප්‍රදේශයේ නාගරාසා ඇලෙක්ස්ගේ දේහය රැගෙන සාධාරණය ඉල්ලා ඊයෙ(21) දින ගම්වාසීහු විරෝධතාවක නිරත වූහ. මියගිය තරුණයාගේ දේහය ආදාහනය කිරීම සඳහා සුසාන භූමියට රැගෙන ගිය අවස්ථාවේදී මෙම විරෝධතාවය සිදුකෙරිණි.

කෙසේ නමුත් පොලිස් වධහිංසා හේතුවෙන් ඇලෙක්ස් මිය ගොස් පැය 48 ක් ගතවී ඇතත් ඒ සම්බන්ධයෙන් කිසිවෙකු අත්අඩංගුවට ගෙන නොමැත.

නාගරාසා ඇලෙක්ස් නැමැති විසි හය හැවිරිදි තරුණයෙකු පසුගිය නොවැම්බර් මස 08 වනදා වඩුක්කෝට්ටේ පොලිසිය විසින් සොරකමක් සම්බන්ධයෙන් සැකපිට අත්අඩංගුවට ගෙන ඇත. පසුව එම ඔහුව පසුගිය 10 වනදා අධිකරණයට ඉදිරිපත් කර තිබුණි.

එලෙස අධිකරණය ඉදිරිපත් කොට ඇත්තේද නොවැම්බර් 10 වැනිදා ශ්‍රී ලංකා මානව හිමිකම් කොමිෂන් සභාවේ යාපනය කාර්යාලයට නාගරාසා ඇලෙක්ස්ගේ මව විසින් සිදු කළ පැමිණිල්ලෙන් අනතුරුව බවයි වාර්තා වන්නේ. ඇය පවසන්නේ පරීක්ෂණයක් සඳහා බව පවසමින් සිය පුතු පොලීසිය විසින් අත්අඩංගුවට ගත් බවයි.

කෙසේ නමුත් පොලීසිය විසින් නොවැම්බර් 10 වැනිදා නාගරාසා ඇලෙක්ස් මල්ලාහම් මහේස්ත්‍රාත් අධිකරණයට ඉදිරිපත් කිරීමෙන් පසුව සැකකරු බන්ධනාගාරගත කරන ලෙස අධිකරණය නියෝග කර ඇත.

ඉන් අනතුරුව දින කිහිපයකට පෙර දී ද අයහපත් සෞඛ්‍ය තත්වය හේතුවෙන් ඔහුව ප්‍රතිකාර සඳහා යාපනය ශික්ෂණ රෝහලට ඇතුළත් කළ බව, එම අවස්ථාවේ දී ඔහු බැලීමට රෝහලට පැමිණි පවුලේ ඥාතියෙකුට නාගරාසා ඇලෙක්ස් තමන් පොලීසිය තුලදී වධ බන්ධනයට මුහුණ දුන් ආකාරය පිළිබඳව කර ඇති විස්තරය එම ඥාතියා විසින් සිය ජංගම දුරකතනයෙන් විඩියෝ ගත කර ඇත.

“පොලිසිය සැක කේස් එකකට අරන් ගිහින් ගැහුවා. හොරකම් සිදු වෙලා කියලා ගැහුවා. පිටි පස්සේ ගැට ගහලා මූණ රෙදි කෑල්ලකින් වහලා වතුර වක්කර, වක්කර ගැහුවා. පොඩ්ඩයි කන්න දුන්නේ. එක ලණුවකින් ගැට ගහලා ගැහුවා. අහ, අහ ගැහුවා. මම නෑ කිව්වා. බෑගයකට පෙට්‍රල් තවරලා දාලා ගැහුවා. මට සිහිනැති වුණා. අත් දෙකම උස්සන්න බෑ. මුලින්ම කෑම දුන්නේ නැ. පසුවදා තමයි කෑම දිලා එයාලගේ කාමරේට අරන් ගිහිල්ලා මුකුත් කියන්න එපා කියලා කිව්වා. ඊලග දවසේ මට තර්ජන කරා. මත්පැන් බොන්න දුන්නා පැක් එකක්…”

විසි හය හැවිරිදි නාගරාසා ඇලෙක්ස් පසුගිය නොවැම්බර් 19 වනදා ඉරිදා යාපනය ශික්ෂණ රෝහලට ගෙන එන විටත් මරණයට පත්ව සිටි බව මරණ පරීක්ෂණ වාර්තාවේ දැක්වේ. එය මහේස්ත්‍රාත් ඒ.ඒ ආනන්දරාජා යටතේ අධිකරණ වෛද්‍ය නිලධාරි විසින් සිදු කළ බවත්, මරණයට පත් වූ තරුණයාගේ පිට කොන්දේ, අත් සහ කකුල්වල තුවාල ගණනාවක් තිබු බව වෝහාරික විශේෂඥ රුද්‍රපසුපති මයෝරදන් නොවැම්බර් 20 වැනිදා නිකුත් කරන ලද මරණ පරීක්ෂණ වාර්තාවේ දැක්වේ.

මේ අතර නාගරාසා ඇලෙක්ස් සමඟ අත්අඩංගුවට ගත් සෙසු පුද්ගලයා ඇප මත නිදහස් කර ඇති අතර, ප්‍රශ්න කිරීමක් සඳහා පොලිසියට රැගෙන ගිය ඇලෙක්ස්ගේ සහයට පැමිණි මිතුරෙක් බව සඳහන් වේ. කෙසේ නමුත් එ​ම තරුණයාගෙන් යාපනය මානව හිමිකම් කොමිසම ප්‍රකාශයක් ලබා ගැනීමට නියමිත බ​ව මාධ්‍යයවේදී කනගරාජ් මහතා පැවසීය. චිතකේනි ප්‍රදේශයේ පදිංචි නාගරාසා ඇලෙක්ස් වට්ටුක්කෝට්ටෙයි පොලිසියේ වධහිංසාවලට ලක්ව මියයාමේ සිද්ධිය සම්බන්ධයෙන් මානව හිමිකම් කොමිසමේ විමර්ශන කටයුතු පිළිබඳව විමසූ විට ඔහු මේ බව පැවසීය. වට්ටුක්කෝට්ටේ තරුණයා සමූල ඝාතනය කිරීම සම්බන්ධයෙන් ඔහු පෞද්ගලිකව යාපනය මහේස්ත්‍රාත් අධිකරණයට සහ මහේස්ත්‍රාත් බන්ධනාගාරයට ගොස් සාක්ෂි ලබාගෙන තිබේ.

මේ අතර මියගිය තරුණයා සමඟ අත්අඩංගුවට ගත් අනෙක් තරුණයාට ඡන්දය ප්‍රකාශ කිරීම සඳහා හෙට (24දා) අධිකරණයේ පෙනී සිටින ලෙස සිතාසියක් යවා තිබේ.

කෙසේ නමුත් පසුගිය ඉරිදා වට්ටුක්කෝට්ටෙයි පොලිසියේ වධහිංසාවට ලක්වූ ඇලෙක්ස් නමැති තරුණයාගේ මරණය දැඩි කම්පනයක් ඇති කර තිබීම විශේෂත්වයකි.

  • සසිදු සහන් තාර​ක
Post Views: 510