Sasindu Sahan Tharaka August 2, 2024
ශ්‍රී ලංකාව සහ ඉන්දීයාව අතර අද (02) පැවති පළමු එක්දින ක්‍රිකට් තරගය තියුණු තරඟයකින් පසු ජය පරායෙන් තොරව අවසන් විය.
තරගයේ කාසියේ වාසිය දිනූ ශ්‍රී ලංකා කණ්ඩායමේ නායක චරිත් අසලංක ප්‍රථමයෙන් පන්දුවට පහරදීමට තීරණය කළේය.
ඒ අනුව පලමුව පන්දුවට පහරදුන් ශ්‍රි ලංකා කණ්ඩායම පන්දුවාර 50 අවසානයෙ කඩුලු 8ක් දැවී ලකුණු 230ක් රැස් කිරිමට සමත් වූ අතර ශ්‍රි ලංකා කණ්ඩායම වෙනුවෙන් පැතුම් නිස්සංක ලකුණු 56ක්ද සටන්කාමි ඉනිමක් ක්‍රීඩා කල දුනිත් වෙල්ලාලගේ සිය මංගල අර්ධ ශතකය වාර්තා කරමින් නොදැවී ලකුණු 67ක්ද ලබා ගැනීමට සමත් විය.
ජයග්‍රහණය සඳහා ලකුණු 231ක ඉලක්කයක් හඹා ගිය ඉන්දීය කණ්ඩායමට පන්දුවාර 47.5ක් තුළ සියලු දෙනා දැවි රැස්කරගත් ලකුණු සංඛ්‍යාව 230ක් පමණි. ශ්‍රී ලංකා කණ්ඩායම වෙනුවෙන් විශිෂ්ඨ පන්දු යැවීමක නිරත වූ නායක චරිත් අසලංක කඩුලු 3ක්ද, වනිදු හසරංග කඩුලු 3ක්ද දුනිත් වෙල්ලාලගෙ කඩුලු 2ක්ද ලබා ගැනීමට සමත් විය.
කෙසේ නමුත් එක්දින ක්‍රිකට් ඉතිහාසයේ ලකුණු සමවීමෙන් අවසන් වූ 45 වන තරගය ලෙස මෙය වාර්තා පොත් අතරට එක් විය.