Sasindu Sahan Tharaka May 31, 20242023 අ.පො.ස. උසස් පෙළ විභාගය සඳහා අයැදුම්කරුවන් 269,613ක් දෙනෙකු පෙනී සිට ඇති බව විභාග දෙපාර්තමේන්තුව පවසයි. ඊයේ (මැයි 31) නිවේදනයක් නිකුත් කරමින් විභාග දෙපාර්තමේන්තුව මේ බව සඳහන් කර ඇත.
විභාග දෙපාර්තමේන්තුව සඳහන් කර ඇත්තේ, උසස් පෙළ විභාගය සඳහා පාසල් අයැදුම්කරුවන් 229,057ක් පෙනී සිට ඇති අතර පෞද්ගලික අයැදුම්කරුවන් 40,556ක් මෙවර විභාගය සඳහා පෙනී සිට ඇති බව ය. ඒ අතරින්, 173,444ක් එනම් 64% විශ්වවිද්‍යාල ප්‍රවේශය සඳහා සුදුසුකම් ලබා තිබේ.
විභාග දෙපාර්තමේන්තුව සඳහන් කර ඇත්තේ, පාසල් අයැදුම්කරුවන්ගෙන් 151,343ක් විශ්වවිද්‍යාල ප්‍රවේශය සඳහා අයැදුම් කිරීමට සුදුසුකම් ලබා ඇති බව ය. පෞද්ගලික අයැදුම්කරුවන්ගෙන් 22,101ක් දෙනෙකු විශ්වවිද්‍යාල ප්‍රවේශය සඳහා අයැදුම් කිරීමට සුදුසුකම් ලබා තිබේ.
මෙවර උසස් පෙළ විභාගයේ පාසල් අයැදුම්කරුවන් 146කගේ විභාග ප්‍රතිඵල අත්හිටුවා ඇති අතර පෞද්ගලික අයැදුම්කරුවන් 44 දෙනෙකුගේ විභාග ප්‍රතිඵල අත්හිටුවා ඇති බව විභාග දෙපාර්තමේන්තුව සඳහන් කරයි. ඒ අනුව, සමස්තයක් ලෙස විභාග අයැදුම්කරුවන් 190ක් දෙනෙකුගේ විභාග ප්‍රතිඵල අත්හිටුවා තිබේ.
මේ අතර, උසස් පෙළ විභාග ප්‍රතිඵලවලට අදාළව එක් එක් විෂය ධාරාව අනුව දිවයිනේ ප්‍රථම ස්ථාන ලබාගත් සිසුන් ප්‍රකාශයට පත් කර ඇත.
ඒ අනුව ජීව විද්‍යා අංශයේ ප්‍රථම ස්ථානය ගාල්ල සංඝමිත්තා බාලිකා විද්‍යාලයේ පහන්මා උපනි ලෙනෝරා හිමිකර ගෙන ඇති අතර කොළඹ ආනන්ද විද්‍යාලයේ ඩව්. ඒ. චිරාත් නිරෝධ ගණිත අංශයෙන් පළමු ස්ථානය දිනාගෙන ඇත.
කලා විෂය ධාරාවේ ප්‍රථම ස්ථානය ගාල්ල රිච්මන්ඩ් විද්‍යාලයේ ටසුන් රිත්මික විතානගේ හිමි කර ගෙන තිබේ.
ඉන්ජිනේරු තාක්ෂණවේදය විෂය ධාරාවේ ප්‍රථම ස්ථානය ගිනිගත්හේන මධ්‍ය මහා විද්‍යාලයේ මුල්විල රාලලාගේ ශෙහානි නවෝද්‍යා මුල්විලගේ හිමි කර ගෙන ඇත.
වාණිජ විෂය ධාරාවේ පළමු ස්ථානය පානදුර බාලිකා මහා විද්‍යාලයේ ශෙහාරා සිතුමිණි පුංචිහේවා සිසුවිය හිමි කර ගෙන තිබේ.
ජෛව පද්ධති තාක්ෂණවේදය විෂය ධාරාවේ ප්‍රථම ස්ථානය ඇහැළියගොඩ මධ්‍ය මහා විද්‍යාලයේ කිරුළු සිහිල්දිය පල්ලියගුරු විසින් හිමි කර ගනු ලැබ ඇත.
