ශ්‍රී ලංකා වරාය අධිකාරිය මඟින් ක්‍රියාත්මක කිරීමට යෝජිත ගාල්ල වරාය නගර සංවර්ධන ව්‍යාපෘතිය යටතේ සිදුකරන මුහුදු ගොඩකිරීම පිළිබඳ සැලැස්ම රජය පිළිනොගන්නා බව ජලජ සහ සාගර සම්පත් නියෝජ්‍ය අමාත්‍ය රත්න ගමගේ පවසයි. එහිදි ඔහු සඳහන් කරන්නේ ගාල්ල වරාය නගර සංවර්ධන සැලැසුම පසුගිය රජය කාලයේ ඇමතිවරුන් විසින් යෝජනා කළ එකක් බවයි.

ගාල්ල ධීවර වරායේ නිරීක්ෂණ චාරිකාවකින් පසු මේ පිළිබඳ මාධ්‍යවේදියෙකු නැඟූ ප්‍රශ්නයකට පිළිතුරු දෙමින් නියෝජ්‍ය අමාත්‍යවරයා මේ බව පැවසීය.

එහිදී අදහස් දක්වමින් ඔහු කියාසිටියේ,

“ගාල්ල වරාය නගර සංවර්ධන සැලැසුම පසුගිය රජය කාලයේ මේ පළාතේ හිටපු ඇමතිවරු හදලා තිබුණු එකක්. එම සැලැස්ම අපි පිළිගන්නේ නැහැ. ඒක අපි හදපු එකක් නෙවෙයි. ගාල්ල වරායේ සිට රූමස්සල දක්වා සංවේදී ප්‍රදේශය ගොඩකරන්න තමයි මෙම ව්‍යාපෘතිය හදලා තියෙන්නේ. මේක පිස්සුවක්. හිසේ අමාරුවක් වගේ වැඩක්.

මේ ව්‍යාපෘතිය සඳහා කොහෙන් හරි මුදල් එන්න ඇති. මුදල් එන කාලයේ මෙකී ව්‍යාපෘතිය සැලසුම් කිරීමට වියදම් කරන්න ඇති. අපේ රජය මගින් කාල බීලා හෝටල්වල ඉඳලා හදපු මෙවැනි සැලසුම් පැත්තකට දමනවා. වරාය නගර සංවර්ධන ව්‍යාපෘතිවලින් වූ විනාශය අපි දන්නවා”

 

Post Views: 54