රත්ගම දේවපතිරාජ විභාග මධ්‍යස්ථාන භූමියට ඇතුල් වී මෙවර අ.පො.ස සාපෙළ විභාගයට පෙනී සිටින පාසල් සිසුවෙකුට පහරදීමේ සිද්ධියක් සම්බන්ධයෙන් සිසුන් දෙදෙනෙකු ඊයේ (08) අත්අඩංගුවට ගත් බැව් රත්ගම පොලිසිය පවසයි.

අත්අඩංගුවට ගෙන ඇත්තේ රත්ගම ගම්මැද්දගොඩ ප්‍රදේශයේ පදිංචි වයස අවුරුදු 17 සහ 16 වියේ පසුවන සිසුන් දෙදෙනෙකි.

පහරකෑමට ලක්වූ සිසුවා රත්ගම දේවිනිගොඩ ප්‍රදේශයේ පදිංචිකරුවෙක් වන අතර ඔහු රත්ගම දේවපතිරාජ පාසලේ ඇති විභාග මධ්‍යස්ථානයේ මෙවර සා.පෙළ විභාගයට පෙනී සිටින සිසුවෙකි.

මෙම සිසුවා විභාග මධ්‍යස්ථාන භූමිය තුළ සිටියදී සැකකාර සිසුන් දෙදෙනා අයුතු ලෙස විභාග මධ්‍යස්ථාන භූමියට ඇතුල් වී සිසුවාට හිස්වැසුමකින් පහරදී ඇති බව පොලිසිය පවසයි. පහර දීමෙන් සිසුවාගේ නළලට තුවාල සිදුව ඇත.

පහරකෑමට ලක්වුවද සිසුවා විභාගයට ඊයේ දින ද පෙනී සිට ඇත. පාසලේ දී ඇති වූ පැරණි ආරවුලක් හේතුවෙන් මෙම පහරදීම සිදුකොට ඇති බව පොලිස් පරීක්ෂණ වලදී අනාවරණය වී ඇත.

අත්අඩංගුවට ගත් සිසුන් දෙදෙනා අද (09) අධිකරණය වෙත ඉදිරිපත් කිරීමට නියමිතව තිබුණි. රත්ගම පොලිස් ස්ථානාධිපති ප්‍රධාන පොලිස් පරීක්ෂක යු.එල්.ඩී ප්‍රියන්තගේ මෙහෙයවීම යටතේ සැකකාර සිසුන් දෙදෙනා අත්අඩංගුවට ගනු ලැබීය.

Post Views: 128