Staff Writer May 31, 2024දඹුල්ල තන්ඩර්ස් කණ්ඩායමේ හිමිකරු වූ බ්‍රිතාන්‍ය පුරවැසි භාවය හිමි තමිම් රහ්මාන් නැමති සැකකරුගේ නඩුව අද (31) කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ කැඳවනු ලැබුවා.
තමිම් රහ්මාන් නැමති සැකකරු ඉදිරියේදී පැවැත්වීමට නියමිත LPL තරංගාවලියේදී තරග පාවාදීමකට සැලසුම් කළේ යැයි සැකපිට අත්අඩංගුවට ගත් අතර, ඔහුව 07 වනදා දක්වා තවදුරටත් රක්ෂිත බන්ධනාගාර ගත කරන ලෙස කොළඹ මහේස්ත්‍රාත් අධිකරණය නියම කළා.
එහිදී ක්‍රීඩා වැරදි වැළැක්වීමේ විමර්ශන අංශය අධිකරණයට දැනුම් දුන්නේ මෙම සිද්ධියට අදාළව තවදුරටත් පරීක්ෂණ සිදු කරන බවයි.
මෙම තරග පාවාදීමේ සිද්ධිය සම්බන්ධයෙන් පැමිල්ලිකරු හා විත්තිකරු අතර ඇතිවූ බව කියන දුරකථන සංවාදවලට අදාළ හඩපට අධිකරණයට ඉදිරිපත් කරන ලෙසත් මෙහිදී මහේස්ත්‍රාත්වරයා විසින් විමර්ශන සිදුකරන පොලිස් කණ්ඩායමට නියම කළා.
ඉන් අනතුරුව නඩුව නැවත ලබන 07 වනදා කැඳවීමටද නියම වුණා.
