Sasindu Sahan Tharaka March 24, 2024මෙම වසරේ ප්‍රථම අර්ධ චන්ද්‍රග්‍රහණය අද (25) සිදුවන බවත් අප්‍රේල් 08 වැනිදා සූර්යග්‍රහණයක් සිදුවන බවත් කොළඹ විශ්ව විද්‍යාලයේ තාරකා විද්‍යා හා අභ්‍යාවකාශ විද්‍යා ඒකකයේ අධ්‍යක්‍ෂ හා නවීන තාක්ෂණ පිළිබඳ ආතර් සී. ක්ලාක් ආයතනයේ සභාපති මහාචාර්ය චන්දන ජයරත්න පවසයි.
මෙම වසරේ ඉදිරියේදී චන්ද්‍ර ග්‍රහණ 02 ක් සහ සූර්යග්‍රහණ 02ක් සිදු වුවද ශ්‍රී ලංකාවාසීන් හට ඒ කිසිවක් දැක දැකගැනීමට අවස්ථාවක් නොලැබෙන අතර, මීළඟට අපට දිස්වීමට නියමිත ග්‍රහණය 2025 සැප්තැම්බර් 07 වැනි දින ඇතිවීමට නියමිත සූර්ග්‍රහණයක් බව මහාචාර්ය ජයරත්න පවසයි.
අද ප්‍රථම අර්ධ චන්ද්‍රග්‍රහණය ශ්‍රී ලංකාවට නොපෙනුනත් එය යුරෝපයේ බොහෝ ප්‍රදේශ, උතුරු නැගෙනහිර ආසියාව, ඔස්ට්‍රේලියාවේ බොහෝ ප්‍රදේශ, අප්‍රිකාව, උතුරු ඇමෙරිකාව, දකුණු ඇමරිකාව, පැසිෆික්, අත්ලාන්තික්, ආක්ටික් සහ ඇන්ටාක්ටිකාව ඇතුළු ලෝකයේ විශාල කොටසකට එය දෘශ්‍යමාන වනු ඇත.
ශ්‍රී ලංකාවේ සම්මත වේලාවට අනුව චන්ද්‍රග්‍රහණය අද සද ක්ෂිතිජයට යටින් ඇති දිවා කාලයේදී පෙරවරු 10.23ට ආරම්භ වී පස්වරු 3.02 ට අවසන් වන අතර ඉන් දින 14කට පසු, එනම් 2024 අප්‍රේල් 08 වැනි දින, පූර්ණ සූර්යග්‍රහණයක් සිදුවනු ඇත.
එය ලෝකයේ බෙහෙවින් ප්‍රසිද්ධියට පත්ව ඇති අතර විශේෂයෙන්ම සූර්යග්‍රහණය දිනයේදී ඇමරිකා එක්සත් ජනපදයේ සමහර පාසල් වසා දමන්නට පවා සැලසුම් කර ඇති බව වාර්තා වේ.
මෙම පූර්ණ සූර්යග්‍රහණයද ශ්‍රී ලංකාවට නොපෙනෙන නමුත් බටහිර යුරෝපයේ, උතුරු ඇමෙරිකාවේ, උතුරු දකුණු ඇමරිකාවේ, පැසිෆික් සාගරයේ, අත්ලාන්තික් සාගරයේ සහ ආක්ටික් ප්‍රදේශයේ රටවලට දෘශ්‍යමාන වන අතර ශ්‍රී ලංකා සම්මත වේලාවෙන් සූර්යග්‍රහණය 2024 අප්‍රේල් 08 වැනි දින රාත්‍රී 9.12 ට ආරම්භ වී අප්‍රේල් 9 වන දින අලුයම 2.22 ට අවසන් වේ.
