Sasindu Sahan Tharaka April 12, 2024සිංහල හා දෙමළ අවුරුදු සමය වෙනුවෙන් ක්‍රියාත්මක බස් සේවාව හරහා සිය දෛනික ආදායම රුපියල් මිලියන 25කින් පමණ ඉහළ ගොස් ඇති බව ලංකා ගමනාගමන මණ්ඩලය පවසයි.
උත්සව සමයේ ගම්බිම් බලා යන ජනතාව වෙනුවෙන් එම මණ්ඩලය පසුගිය 5 වනදා සිට අතිරේක බස් රථ 200ක් පමණ ධාවනයට එක්කරමින් විශේෂ ගමනාගමන සේවාවක් ආරම්භ කරනු ලැබූ අතර ලංකා ගමනාගමන මණ්ඩලයේ නියෝජ්‍ය සාමාන්‍යාධිකාරී පණ්ඩුක ස්වර්ණහංස සඳහන් කළේ, ඒ හරහා මේ වනවිට සිය දෛනික ආදායම රුපියල් මිලියන 25කින් පමණ ඉහළ ගොස් ඇති බවයි.
කෙසේවෙතත්, ප්‍රමාණවත් පරිදි දුර ගමන් සේවා බස් රථ නොමැති වීම හේතුවෙන් පිටකොටුව බැස්ටියන් මාවත හා මධ්‍යම බස් නැවතුම්පොළ වෙත පැමිණි තමන් දැඩි අපහසුතාව පත්වු බවට මගීන් චෝදනා කරනු ලැබීය. ඊට ප්‍රතිචාර දක්වමින් ලංකා ගමනාගමන මණ්ඩලයේ නියෝජ්‍ය සාමාන්‍යාධිකාරී පණ්ඩුක ස්වර්ණහංස පැවසුවේ ප්‍රමාණවත් පරිදි බස් රථ නොමැති බවට සිදුකරන චෝදනා ප්‍රතික්ෂේප කරන බවයි.
මේ අතර, ඊයේ දිනය තුළ අධිවේගී මාර්ගවල ආදායම 10%කින් පමණ ඉහළ ගොස් ඇති බව මාර්ග සංවර්ධන අධිකාරිය පවසයි.
එහි ප්‍රකාශකයෙකු පවසා ඇත්තේ, අද සිට ලබන 15 වන දින දක්වා අධිවේගී මාර්ගවල ආදායම සැලකිය යුතු මට්ටකින් ඉහළ හා හැකි බවට පුරෝකථනයක් සිදුකළ හැකි බවයි.
මේ අතර, දුම්රිය දෙපාර්තමේන්තුව පවසන්නේ, ප්‍රධාන මාර්ගයේ දෛනිකව ගමන් කරන දුර ගමන් සේවා වාරවලට අමතරව පසුගිය 10 වනදා සිට අප්‍රේල් 15 දක්වා සාමාන්‍ය දුර ගමන් දුම්රිය සේවා හැර අතිරේක දුම්රිය 12ක් ධාවනයට එක්කර ඇති බවයි.
ඒ අනුව, බදුල්ල දක්වා දුම්රියන් 02ක්, බදුල්ල සිට කොළඹ දක්වා දුම්රියන් 02 ක්, ගාල්ල දක්වා දුම්රියන් 02ක්, ගාල්ල සිට කොළඹ දක්වා දුම්රියන් 02ක්, බෙලිඅත්ත දක්වා දුම්රියන් 02ක් හා බෙලිඅත්ත සිට කොළඹ දක්වා දුම්රියන් 02 ක්ද වශයෙන් එම දුම්රියන් ගමන් වාර ක්‍රියාත්මක වේ.
