යුද්ධයේදී අතුරුදහන් වූ තම ඥාතීන් පිළිබඳ සත්‍ය සෙවීමේ සිය දුක්ඛිත උත්සාහයට වසර හතක් සම්පූර්ණවීමට සමගාමීව බලහත්කාරයෙන් අතුරුදහන් කරවූවන්ගේ පවුල්වල සාමාජිකයන් අද පෙරවරුවේ කිලිනොච්චියේදී මහා පෙළපාලියක් පැවැත්වීමට නියමිතව ඇත.

ඒ අනුව බලහත්කාරයෙන් අතුරුදහන් කරවූවන්ගේ ඥාතීන් සඳහා වූ සංගමයට අයත් උතුරු සහ නැගෙනහිර පළාත්වල ශාඛා පහක සාමාජිකයන් සිය ගණනක් කිලිනොච්චිය වටා රොක් වී ඔවුන්ගේ දුක්ගැනවිලි සනිටුහන් කිරීමට නියමිත බව වාර්තා වේ.

වාර්තා වෙන පරිදි මෙහි ප්‍රධාන පෙළපාලිය කිලිනොච්චියේ කන්දසාමි කෝවිලෙන් පෙරවරු 9.30ට පමණ ආරම්භ වී කිලෝමීටර් හතරක් දුරින් පිහිටි ඩිපෝ හන්දියේ විශේෂ ස්මාරකය දක්වා ගමන් කිරීමට නියමිතව ඇති අතර යාපනය, මුලතිව්, මන්නාරම සහ වව්නියාව යන ප්‍රදේශවල බලහත්කාර අතුරුදහන්වීම්වලට ගොදුරු වූවන්ගේ ඥාතීන්, විශේෂයෙන්ම වැන්දඹු මව්වරුන් මෙම හත්වැනි සංවත්සරය සඳහා කිලිනොච්චියට පැමිණීමට නියමිත බවත් වාර්තා වේ.

2017 පෙබරවාරි 20 වැනි දින සිට ක්‍රියාත්මක වන මෙම අනුස්මරණය සඳහා උතුරු පළාතේ සියලුම දිස්ත්‍රික්කවල දෙමළ දේශපාලන පක්ෂ නායකයන් සහයෝගය ලබා දීමට ප්‍රතිඥා දී ඇත.

බලහත්කාරයෙන් අතුරුදහන් කරවූවන්ගේ ඥාතීන් සඳහා වූ සංගමයේ මූලාශ්‍රවලට අනුව, 2009 යුද්ධයේ පසුකාලීන අවස්ථාවලදී පුද්ගලයන් 200,000කට වැඩි පිරිසක් අතුරුදහන්ව ඇති බව වාර්තා වේ.

Post Views: 304