Sasindu Sahan Tharaka April 25, 2024
මුදල් ගෙවා තිබියදීත් මුදල් වංචා කළැයි කියමින් මිනිසුන් අත්අඩංගුවට ගැනීම පිළිබඳව දැඩි ලෙස පොලිසිය දෝෂාරෝපණයට ලක් කළ වැලිසර මහේස්ත්‍රාත් තුසිත ධම්මික උඩුවව්දාන, මුදල් වංචා කළැයි කියමින් සැකපිට අත්අඩංගුවට ගෙන අධිකරණයට ඉදිරිපත් කළ උපුල් ශාන්ත සන්නස්ගල ඇප මත මුදාහැරීමට ඊයේ (25) නියම කළේය.
චිත්‍රපටයක් නිෂ්පාදනය කිරීමට බව පවසා කඳාන ප්‍රදේශයේ පුද්ගලයකුගෙන් රුපියල් ලක්ෂ 10ක මුදලක් ලබාගෙන එම මුදල ආපසු නොදී විශ්වාසය කඩ කරන ලදැයි කියන සිද්ධියක් සම්බන්ධයෙන් කඳාන පොලිසිය විසින් සන්නස්ගල මහතා අත්අඩංගුවට ගෙන අධිකරණයට ඉදිරිපත් කර අතර සිද්ධියට අදාළව කරන ලද විමර්ශනවල ප්‍රගතිය දැක්වෙන වාර්තාවක් ඉදිරිපත් කළ කඳාන පොලිසියේ නිලධාරීහු, චිත්‍රපටයක් නිෂ්පාදනය කිරීමට බව පවසමින් මාසයක කාලයක් තුළ ගෙවීමේ පොරොන්දුව මත සැකකරු පැමිණිලිකරුගෙන් රුපියල් ලක්ෂ10ක මුදලක් ලබාගෙන ඇතැයිද එම මුදල නියමිත දිනයේදී ආපසු නොදී විශ්වාසය කඩකර ඇතැයිද පැවසීය.
මේ පිළිබඳ ලැබුණු පැමිණිල්ලකට අනුව සැකකරු අත්අඩංගුවට ගත් බව දැනුම් දුන් කඳාන පොලිසියේ නිලධාරීන් සිද්ධිය සම්බන්ධයෙන් තවදුරටත් විමර්ශන කරන හෙයින් සැකකරු රිමාන්ඩ් කරන්නැයි ඉල්ලා සිටි අතර එහිදී සැකකරු වෙනුවෙන් පෙනී සිටි නීතිඥවරු කරුණු දක්වමින් තම සේවාදායකයා චිත්‍රපටයක් නිෂ්පාදනය කරන බව දැනගෙන පැමිණිලිකරු රුපියල් ලක්ෂ 10ක මුදලක් දුන්නේ ප්‍රදානයක් වශයෙන් මිස ණය මුදලක් වශයෙන් නොවේ යැයි කරුණු දක්වමින් පැවසීය.
කෙසේනමුත් පසු අවස්ථාවක සේවාදායකයා ඔහුට අදාළ මුදල ගෙවූ බව දැනුම් දෙමින් ඒ සඳහා මුදල් කුවිතාන්සිද උසාවියට ඉදිරිපත් කළ නීතිඥවරු මේ පිළිබඳ කරුණු පොලිසියට දැනුම් දුන්නත් ඔවුන් එම කරුණු නොසළකා අත්අඩංගුවට ගෙන අධිකරණයට ඉදිරිපත් කළ තම සේවාදායකයාට ඇප නියම කරන්නැයි ඉල්ලා සිටියහ.
දෙපාර්ශ්වයේම කරුණු සලකා බැලීමෙන් අනතුරුව පොලිසියේ ක්‍රියාකලාපය දැඩි ලෙස දෝෂාරෝපණයට ලක්කළ මහේස්ත්‍රාත්වරයා සැකකරු ඇප මත මුදාහැරීමට නියම කළේය.
